BAGUIO CITY – Nakasaganan dagiti personnel ken kagawaan ti Municipal Disaster Risk Reduction and Management Office (MDRRMO) ti La Trinidad, Benguet nga agresponde kasaruno ti mapaspasaran a saan a napintas a sasaaden ti panawen iti lokalidad.
Iti interview ti Bombo Radyo Baguio, kinuna ni La Trinidad MDRRM Officer Yoshio Labi nga adda laeng ti maysa a panagreggaay ti daga iti deppaar ti Barangay Alno a napasamak idi agsapa ngem dagus a nadalusan kalpasan ti panagresponde dagitoy.
Kinunana nga agtultuloy met ti panagwanawanda kadagiti naririsgo a disso sadiay La Trinidad kas iti Swamp area, iti deppaar ti Little Kibungan ken iti Parapad, Ambiong partikular iti Muslim area.
Dinakamatna nga adda met ti taripnong dagitoy ita a malem tapnu matalantan ti panakarisut ti parikut iti panaglayos sadiay iti kanito a ngumato ti lebel ti danum iti Balili River ken ti Bolo Creek.
Sigun kenkuana, iti agdama ket awan pay ti panagngato iti danum iti nasao a karayan ken waig gaputa dinalusanda dagitoy.
Innayonna a nakasagana metten dagiti evacuation centers sadiay La Trinidad a bukbuklen dagiti evacuation centers kadagiti barangay ken ti municipal evacuation centers sadiay Puguis ken iti maikatlo a kadsaaran ti MDRRM building malaksid pay iti inaramid ti DILG a clustered evacuation centers sadiay Alapang ken Lubas.
Agtultuloy pay ti panangisuroda iti panagtungpal dagiti umili iti balakad ken pakdaar mainaig iti panagbakwit iti kanito a dumteng dagiti kalamidad.
