BAGUIO CITY – Nangipwesto ti Public Order and Safety Division kadagiti personnelda nga agbantay idiay Burnham Park tapno maipasigurado ti panakasurot dagiti ordinansa iti Baguio City manipud iti alas syete ti agsapa agingga alas nuebe ti rabii tunggal aldaw.
Iti panakiuman ti Bombo Radyo kenni POSD Chief Daryll Kim Longid, maysa kadagiti bambantayanda dagiti illegal a mangidia-diaya iti masahe.
Inlawlawagna a maysa kadagiti lablabsingen dagitoy ti sanitation gapu ta open space ti pangipatpatungpalanda ti panagmasahe.
Karaman pay kadagiti mangidia-diaya iti henna tattoo nu sadinno maiparit daytoy iti sidong ti Environmental code ken sanitation code ti siudad.
Sigun iti opisyal adu dagiti ma-awawatda a reklamo mainaig kadagiti maidiay-diaya a serbisyo kas iti henna tattoo ken masahe.
Kinuna pay ni Longid nga adda dagiti masahista a saanen a mangisubli ti barya dagiti customerda ken daduma pay.
Kaaduan met kadagiti mangidia-diaya iti massage service iti Burnham Park ket nagtaud kadagiti nagduduma a lugar iti pagilyan.
Maysa kadagiti modus dagiti masahista iti nasao a parke ti panang-intimidate kadagiti customer.
Apela met ti opisyal kadagiti mangidiay-diaya ti masahe ken henna tattoo iti Burnham park a mangalada iti pagpwestoanda ken mangalada ti permits manipud iti local a gobyerno.//Bombo Mae Bagsang
