BAGUIO CITY – Kidkiddawen ti mayor ti Baguio ti panangikonsidera ti City Council iti panaka-amyendar ti ordinansa a mangimanmandato iti panagaramat ti face shield ditoy siudad.
Kidkiddawenna a malimitaran laeng ti panagaramat ti face shield kadagiti kritikal a lugar ti COVID-19 kas kadagiti ospital ken isolation centers.
Iti surat a napetsaan iti Nobyemre 8 a naipatulod iti bise mayor, kinuna ti mayor a mabalinen nga ikonsidera ti siudad a palukayan ti panagaramat ti face shield.
Daytoy ket kalpasan a nagun-uden ti 71.18% a full vaccination accomplishment iti adult target population, no sadino, posible pay a dumanon daytoy iti 90% iti ngudo ti agdama a tawen.
Malaksid iti dayta, naobserbaran metten ti panagbaba ti kaso ti COVID-19 iti siudad a rason iti panakapalukay dagiti restrictions ken panakailukat manen ti adu nga aktibidad ti ekonomiya.
Imbinglay pay ti mayor a kapada metlaeng a singasing ti ad-adalen ita ti National Inter-Agency Task Force on Emerging Infectious Diseases Technical Working Group.
Maipalagip a naibilin ti panagaramat ti face shield babaen ti Ordinance No. 49, series of 2021 a nang-amyendar ti Ordinance No. 45, series 2020 wenno ti Face Mask Ordinance ti siudad.
Idekdeklara ti ordinansa a panaglabsing iti linteg ti saan a panagaramat ti face shield ken face mask dagiti amin nga indibidual pakairamanan dagiti turista ken outsiders nga agturong kadagiti parapubliko nga lugar, pasdek, kalkalsada wenno establishimento agingga nga agtultuloy ti pangta ti COVID-19.
Iparparit pay ti ordinansa ti transaksion dagiti indibidual kadagiti negosyo wenno establishimento nga awanan ti face mask ken face shield.
Mamulta ti P500 agingga P2,000 ti asinoman nga aglabsing iti ordinansa ken makanselar ti business permit dagiti aglabsing nga establishimento.
