BAGUIO CITY – Impangta ti baro a dadaulo ti Police Regional Office Cordillera ti panakaikkat dagiti pulis a saan a pumasa iti PNP Integrated Health and Physical Fitness Program.
Sigun kenni Cordillera PNP regional director PCSupt. Edward Carranza, maiparbeng laeng a maikkat iti serbisyo dagiti pulis a saan a makabael a mangtaripato iti bukod dagitoy a bagi.
Kinunana a dagiti pulis nga addaan dadakkel a buksit wenno buttiog ket nasken a mairekomendar nga addaan ti “total physical disability” gaputa saanda a kabaelan nga aramiden a naimbag ti responsibilidad dagitoy kas panakabagi ti linteg.
Sigun kenkuana, sakbay daytoy a pimmanaw iti sigud a posisyonna kas direktor ti PNP Health Services ket inrekomendarna ti panakaikkat dagiti pulis a mapaay a maaddaan ti umno a dagsen ken umno a pammagi.
Maipalagip a sinukatan ni PCSupt. Edward Carranza ni PCSupt. Elmo Francis Sarona nga ita ket dadaulo met ti Directorate for Investigation and Detective Management sadiay PNP Headquarters.
