BAGUIO CITY – Ikagkagumaan ti lokal a gobyerno ti Bokod, Benguet nga agbiruk iti pondo para iti panaka-kongkreto dagiti amin a kalsada dagiti 10 a barangay ti munisipyo.
Pammalawag daytoy ni Bokod Mayor Thomas Wales Jr. kalpasan a naipablaak iti social media dagiti ladawan iti panagbagkat dagiti residente ti Sitio Bisal iti Barangay Bobok-Bisal iti maysa a pasyente ken impagnada daytoy iti 8 a kilometro paturong iti kaasitgan a kalsada.
Impettengna a maawatanna ti pakaseknan ti nangipablaak kadagiti nasao a ladawan, partikular ti saan a napintas a kondisyon ti kalsada a saan a nakongkreto ken ti kaawan ti ambulansia.
Inlawlawag a madanun laeng ti Sitio Bisal babaen iti foot trail nupay addan ti bassit a paset ti kalsada a nakongkreto.
Dinakamatna a manipud 2016 agingga ita, agarup 2.8 kilometro a paset ti kalsada ti nasemento babaen iti pondo a naalana iti nasyonal a pondo, iti opisina ti sigud a Benguet Congressman Ronald Cosalan, iti opisina ni sigud nga Agriculture Secretary Manny Piñol ken iti provincial government ti Benguet.
Sigun kenkuana, 7 kilometro iti nasao a kalsada ti Sitio Bisal ti saan pay a nakongkreto isut gapuna a napitak ken saan a mabalin a pagdalysatan tunggal panagtutudo.
Inaklon pay ti mayor a saan a kabaelan ti municipal government ti Bokod a mangpondo iti amin a kiddaw a proyekto a pang-imprastraktura dagiti babbarangay sadiay.
Nupay kasta, dinakamat ni Mayor Wales Jr. nga addan ti nakapila a kiddaw ti munisipyo sadiay nasyonal a gobyerno para iti panaka-ileppas ti panakakongkreto ti kalsada ti Bobok-Bisal. -flor/editedND
Patienna pay a saan a nagpatulong iti municipal government ti maseknan a residente.
Dinakamatna nga adda met ti tallo nga on-call nga ambulansya ti munisipyo.
Gapu iti daytoy, inyapelana ti saan a panakababalaw dagiti opisyal ken empleyado ti maseknan nga opisina ti munisipyo mainaig iti nasao nga isyu.
Inlawlawagna nga amin dagiti 10 a barangay ti Bokodk ket addaan met ti Barangay Health Workers a mabalin a pagkamangan dagiti umili gaputa adda ti emergency contact numbers ti municipal government kadagitoy. (report ni Bombo Florence Paytocan)
