BAGUIO CITY–Makidkiddaw ti panagtinnulong ti lokal a gobierno ti Baguio ken dagiti maseknan nga ahensia ken opisina iti panakabukel ti ordinansa a mang-regulate kadagiti baggage boys wenno komboy iti merkado publiko ti siudad.
Iti panakiyuman ti Bombo Radyo Baguio kenni Daryl Kim Longid, Deputy Chief ti Public Order and Safety Division (POSD), kinunana a kasapulan a mabukel ti maysa a linteg a mangipaay bileg iti lokal a gobyerno a mangkontrol iti operasyon dagiti komboy iti lokalidad.
Impettengna a daytoy ket para iti nasaysayaat a sitwasyon iti merkado publiko nangruna ita a panawen ti pandemya.
Dinakamatna nga adda ti resolusyon ti Baguio City Market Authority a nangipaay iti oportunidad iti empleyo kadagiti komboy iti merkado publiko ngem kasapulan ti regulasyon iti daytoy.
Innayonna a nasken nga agala dagiti komboy iti ID dagitoy ken agparehisroda iti lokal a gobyerno babaen iti panangisumitirda kadagiti kaskenan a dokumento kas iti medical certificate, police clearance ken iti resulta ti drug test.
Inyunay-unay pay ni Longid a kasapulan a ma-regulate ti panagpresyo dagiti komboy iti serbisyo dagitoy kalpasan a naamuan nga adda ti overpricing a mapaspasamak iti serbisyo dagitoy nga intunda dagiti nagduduma nga asosasyon dagitoy.
Daryl Kim Longid, Deputy Chief ti Public Order and Safety Division (POSD)
