BAGUIO CITY – Im-imbestigaran paylaeng dagiti pulis ken bombero ti panakauram ti maysa a taxi sadiay Purok 20, Irisan, Baguio City idi parbangon.
Ti nasao a taxi ket addaan ti trade name a BBPCBI Taxi ken plaka nga AYR 885.
Nabigbig ti driver a ni Romando Gumatin, 47-anyos ken residente ti San Carlos Heights, Baguio City bayat a ti operator ket ni Keifer Pagaduan, residente ti Camdas, Baguio City.
Maibasar iti report, intawag ti maysa a maseknan nga umili ti insidente kadagiti otoridad a dagusda met a rinesponde-an.
Naamuan a nakaparada ti nasao a taxu idi napuoran daytoy ken naamuan a naudi a nagbiahe daytoy idi kanikadua.
Awan met ti nadangran iti insidente bayat nga awan paylaeng ti danyos ti uram.
Maipalagip a daytoyen ti maikadua nga insidente ti panaka-uram ti lugan sadiay Irisan ita a tawen, no sadino, immuna a nauram sadiay Purok 12 ti tallo a parapasahero a bus.
