Maysa kadagiti ipangpangruna iti lokal a gobyerno iti La Trinidad, Benguet ti panakaamyendar iti Solid Waste Management Ordinance Act of 1998.
Sigun kenni La Trinidad Vice Mayor Roderick Awingan, daytoy ket maysa nga addang tapno mapasayaat ti solid waste management iti nasao a munsipyo.
Naobserbaran ngamin a nabayagen a saan a nabalbaliwan ti nasao nga ordinansa.
Sigun met kenni La Trinidad Councilor Belmer Elis, ti committee head iti solid waste management, nasken a mabaliwan ti nasao nga ordinansa tapno marisut dagiti pakaseknan nga impablaak ti Commission on Audit seknan iti Solid Waste Management iti pagilian a Pilipinas.
Maibasar iti inruar ti Comission on Audit, saan unay nga epektibo wenno awan unay ti nakita a positibo nga epekto dagiti solid waste management act nga inpatpatungpal dagiti local government unit iti las ud ti dua a dekada.
Sigun iti nasao nga opisina, imbes a maksayan ti pannakapataud dagiti basura iti pagilian a Pilipinas,ad-adda pay a kimmaro.
Naobserbaran a ti maysa a problema iti daytoy ket ti saan nga umno wenno kinakurang ti implementasyon dagiti maseknan nga opisina kadagiti waste segregation practices nu sadino, naglalaok dagiti basura kadagiti landfills.
Gapu iti dayta, impeksa ni Elis nga adalenda a nalaing ti panakabaliw ti nasao nga ordinansa iti munisipyo ti La Trinidad kas panakikaykaysa iti intero a pagilian iti tarigagay a panangkissay kadagiti basura ken panangtaripato iti aglawlaw.//Bombo Genzel Depayso
