BAGUIO CITY–Insingasing ni Baguio City Councilor Levy Lloyd Orcales ti panakibinnadang ti City Health Services Office iti Philippine Red Cross (PRC) Baguio Chapter para iti panaka-aramat ti RT-PCR Saliva testing ditoy siudad.
Kinunana a babaen iti daytoy ket maipakaammo kadagiti amin nga umili ti saliva testing nangruna ta dumanon laeng iti P2,000 ti bayadan ditoy.
Inlawlawagna a babaen iti saliva wenno katay ket maamuan no positibo iti COVID-19 ti maseknan nga indibidual.
Immunan nga inyunay-unay ti Philippine Red Cross nga umno ti resulta ti saliva testing ken maysa laeng nga aldaw ti mauray sakbay a rumuar ti resulta daytoy.
Nupay kasta, inwaragawag ni City Health Officer Dr. Rowena Galpo a saan paylaeng a maipanamnama ti panakaipatungpal ti nasao a testing gaputta iti agdama ket awan pay ti naawatda a pagalagadan seknan iti panakaaramat daytoy.