Nangrugin a maaramid ti L-shaped nga overpass idiay La Trinidad, Benguet, sigun iti Benguet 1st District Engineering Office.
Ti nasao a proyekto ket naituding a maileppas iti las-od ti 259 nga aldaw wenno inton Mayo 11, 2025 babaen iti Tsai-Shen Construction nu sadino addaan daytoy iti pondo nga agarup P24 million.
Ti L-shaped overpass ket maaramid iti Km. 5, La Trinidad, Benguet, iti maysa a gasoline station a maikonektar iti Municipal Tourism building ken daytoy ket ma-extend iti kalsada nga asideg ti maysa a nalatak a fast food restaurant.
Sigun kenni Jupiter Bacaoat, ti project engineer, naikargan dagiti scaffoldings dagiti columns bayat a sumaruno a maikarga ti semento iti kabiitan a panawen.
Maipalagip a ti konstruksyon ti L-shaped overpass ket nangrugi idi tawen 2015 nga addaan panggep a mangrisut iti nailet a trapiko iti nasao a lugar nupay kasta, impasardeng daytoy ti Department of Public Works and Highways (DPWH).
Ti panakaaramid ti overpass ket maiggedan iti reblocking a maipatpatungpal iti kalsada ti La Trinidad a manipud Stobosa ti Km.3 aginnga Km.5.
