Maisingsingasing ti panagaramid ti narrative reports ti Department of Labor and Employment(DOLE) ken ti Department of Social Welfare and Development(DSWD) tunggal adda ti ipaay dagitoy a benepisyo tapno mamintinir ti transparency dagiti programa nga ipatpatungpalda.
Nalukatan daytoy a pakaseknan kasaruno ti maatap a panakapulitika dagiti sumagmamano a government relief programs kas ti Tulong Panghanapbuhay sa Ating Disadvantaged/Displaced Workers (TUPAD), ken ti Ayuda para sa Kapos ang Kita Program (AKAP) nu sadino, agparparang a maiwarwaragawag a dagiti pondo a naaramat ket nagtaud a mismo kadagiti sumagmamano nga opisyal iti laksid a nagtaud daytoy iti pondo ti gobyerno.
Iti panakiuman ti Bombo Radyo kenni Atty.Jose “Joemol” Molintas,konsehal ti Baguio City, nakaawat dagitoy ti report nu sadino, bayat ti panagatendar ti maysa a pulitiko iti orientation dagiti benepisyaryo ti maysa a programa, nangipaay daytoy ti panagbitla ken arigna ket agkamkampanya para iti eleksyon.
Dinakaamat ni Atty. Molintas a nupay awan ti guidelines a masursurot para iti panakaiwaras dagiti benepisyo,nalawag a maiparit iti anti-epal law ti panangitandudo iti nagan babaen kadagiti inisyatibo a pinondoan ti gobyerno.
Kagiddan dayta, insingasing ti nasao nga opisyal kadagiti maseknan nga ahensya nga ideretsoda lattan kadagiti remittance centers dagiti maiwaras a payouts dagiti benepisyaryo tapno maliklikan a mainaig daytoy iti pulitika.//Bombo Rob Dominguez