BAGUIO CITY – Manamnama a marugyan ti panagpabakuna dagiti indibidual a karaman iti A4 ita a bulan ditoy siudad ti Baguio.
Sigun kenni Mayor Benjamin Magalong a manamnama a marugian daytoy iti maikadwa a lawas ti bulan ti Hunyo.
Inlawlawagna nga adu paylaeng dagiti indibidual a karaman iti kategorya ti A1, A2 ken A3 a saan pay a nabakunaan ngem nasken a marugianen ti panagpabakuna dagiti A4.
Kinunana a saanen a kasapulan nga maillepas ti panagpabakuna kadagitoy gaputa adu dagiti A4 a mang-ur-uray iti panagbakuna dagitoy.
Nupay kasta, imbinglayna a maipaayan dagiti A1, A2, A4 ti fast lane no sadino mabalinda latta a maakomodar iti kanito a mabakunaanen dagiti A4.
Kabayatanna, inwaragawag metlaeng ni Mayor Magalong nga in-inot a ngumat-ngato ti acceptance rate ti vaccination ditoy siudad.
Kagiddan iti daytoy, pinunasna ti amak dagiti indibidual a saanda a tarigagay nga agpabakuna nga amangan a makapasar dagitoy ti diskriminasyon.
Kinunana a saanda a mabalin a piliten dagiti indbidual a saanda a kayat nga agpabakuna.