BAGUIO CITY – Namnamaen ti presidente ti Association of Barangay Councils ti Baguio nga agbalin a karit kadagiti dadduma pay a barangay ti siudad ti panakaiwaragawag dagiti 16 a barangay ti Baguio a naibilang kas top performing communities iti implementasyon ti Smoke-Free Baguio Ordinance.
Iti interview ti Bombo Radyo Baguio, kinuna ni Councilor Michael Lawana a maibagana a napintas ti implementasyon dagiti amin a barangay ti siudad iti ordinansa kontra iti panagsigarilyo.
Nupay kasta, kinunana nga adda dagiti nagkurang iti dokumentasyon ken adda dagiti nakita a saggaysa a probisyon ti ordinansa a saanda a naimplementar.
Gapu iti daytoy, namnamaena a pasayaaten dagiti dadduma a barangay ti panagaramidda ti report wenno dokumentasyon ken irtenganda pay ti kampanyada kontra iti panagsigarilyo iti masakupanda.
