BAGUIO CITY – Impannakel ti Department of Environment and Natural Resources (DENR)-Cordillera dagiti naaramidanda idi 2021 nangruna ta nabigbig ti rehion kas Top performer iti entero a pagilian.
Iti panakiuman ti Bombo Radyo Baguio, imbinsa-binsa ni DENR-CAR Regional Executive Director Engr. Ralph Pablo dagiti napasayaat ken napapintas pay a programa ti ahensia.
Dinakamatna a dumanon iti 107% ti accomplishement ti DENR-CAR iti clean air act ken 132% iti clean water act.
Kinunana a sipud nangrugi ti pandemya ket naksayan ti bilang dagiti lugan nga agbibiahe a nakatulong iti pananakessay ti pollution a mang-ap-apektar iti nadalus a pul-oy ti angin.
Kinunana pay ni Pablo nga ado a karayan ti nadalusan pakairaman ti lamut river a nagkampeon idi 2019, bued river a nanggun-od ti maikadua a pwesto ken Apayao Abulog River nga entry ti Cordillera idi napan a tawen.
Kabayatanna, nailista metlaeng ti DENR-Cordillera ti 141% nga accomplishement iti Solid Waste Management Act ken 206% iti GEO Hazard Ground Water Assessment and Responsible Mining.
Dumanon met iti 103% ti accomplishment ti ahensia iti National Greening Project no sadino nasurok 4 million a seedlings ti kayo ti immulada iti 3,510 nga ektarya ti kalawana a daga.
Impetteng pay ni Pablo a nainget metlaeng nga impatungpalda ti forest protection ken anti-illegal logging a nagresulta iti panakakumpiskar ti 213,000 a kayo ken nakatiliwan dagiti violators.
Impaganetgetna a saan a lapped ti pandemya iti panakaipatungpal ti nagduduma a programa ti ahensia no sadino nagserbi daytoy a karit para kadakuada tapno agbalinda pay a responsable ken agsalukag iti trabaho.
