BAGUIO CITY – Naibilinen kadagiti 10 nga istasyon ti pulisya ditoy siudad ti Baguio ti panangbukelda iti bukod dagitoy a Drug Enforcement Unit (DEU) kasaruno ti panakaisubli ti partisipasyon ti pulisya iti kampanya kontra iti iligal a droga.
Sigun kenni PCI Nicomedes Olarte, dadaulo ti DEU ti Baguio City Police Office (BCPO), karaman ti nasao a banag iti naipaulog a supplemental guidelines iti panangipatungpal ti pulisya iti operasyon kontra iti iligal a droga.
Kinunana a dagitoy ti agbalin a katulongan ti DEU iti implementasyon ti nasao a kampanya.
Innayonna a karaman met laeng kadagiti pagalagadan ti panagaramat dagiti operating officers iti recording devices no adda ti kabalinanna.
Sigun kenkuana, maisubli met laeng ti implementasyon ti Oplan Tokhang iti tunggal istasyon ti BCPO.
