BAGUIO CITY – Maisingsingasing ti panakabukel ti linteg a mangipataw ti pannusa kadagiti real state lessors wenno agpapaabang ditoy Baguio City a maduktalan nga agpapa-abang kadagiti kriminal partikular dagiti adda koneksionda iti iligal a droga.
Insingasing daytoy ni Cresencia Village Punong Barangay George Fangroy kalpasan ti nagsasaruno a panakakemmeg dagiti sumagmamano nga indibidual a konektado iti iligal a droga iti masakupanda a barangay.
Kinunana a kadawyan a makemkemmeg sadiay Cresencia Village Barangay ket dagiti dayo ken apagbiit laeng a nagabang kadagiti balay pagabangan iti nasao a barangay.
Dinakamatna a kasapulan nga ingetan dagiti agpapa-abang ti panagsukimatda kadagiti potential borders sakbay nga awatenda dagitoy iti paab-abangda a balay.
Sigun kenkuana, iti kanito a maduktalan wenno matiliwan nga adda dagiti borders nga agar-aramid ti iligal nga aktibidad ket nasken nga adda metlaeng ti sungbatan iti linteg ti maseknan a lessor.
Dinakamat pay ti kapitan a maladingitan unay daytoy gaputa madaddadael laeng ti imahe ti barangayda gapu kadagiti dayo a mangipatpatungpal ti iligal nga aktibidad iti masakupanna.
Maipalagip a nasertipikaran a ‘drug-free’ ti nasao a barangay ngem namulitan daytoy a record idi nakemmeg ti maysa na drug pusher idi napalabas a lawas.
Dinakamatna pay nga agarop 50 ti bilang dagiti legal nga agpapa-abang iti barangayda bayat ng adda dagiti sumagmamano nga iligal nga agpapa-abang.
