BAGUIO CITY – Kidkiddawen dagiti health sectors iti Provincial Inter-Agency Task Force ti panakabukkel ti maymaysa a polisiya a suroten dagiti umili ti Benguet kabayatan ti panakaipasidong ti probinsiya iti Modified Enhanced Community Quarantine.
Sigun kenni BeGH Acting Chief Dr. Meliarazon Dulay, nasaysayaat no maymaysa a protocol ti suroten dagiti umili tapno awanen ti agpinpinabasol no malabsing dagitoy.
Kidkiddawenna metlaeng ti panangisumiter dagiti lokal a gobyerno iti dokumento ken report seknan iti panagtulnog dagiti tattao tapno adda ti maiparangda iti Regional IATF.
Impetteng ni Dulay a karaman ti probinsiya iti “GREEN ZONE” gapu iti panagbaba ti kaso ti COVID-19 ngem inyunay-unayna manen ti panagtulnog dagiti umili kadagiti minimum public health standard ken panagwanawan dagiti opisyal tapno mamintinir ti sumaysayaat a sitwasyon ti Benguet.
