BAGUIO CITY – Ibilbilang ni Baguio City Mayor Benjamin Magalong a bendisyon ti nasapa a panakaduktal ti kaadda ti COVID-19 UK variant iti rehion Cordillera, partikular sadiay Bontoc, Mountain Province ken iti La Trinidad, Benguet.
Iti eksklusibo nga interview ti Bombo Radyo Baguio, inlawlawagna a daytoy ket gaputa nakaaramid dagiti maseknan nga LGUs iti napartak nga aksion tapnu makontrol wenno malapdan ti panagwaras ti nasao a variant ti COVID-19 ditoy rehion.
Innayonna a napimpintas a nasapa a naduktalan ti kaadda ti nasao a variant ti coronavirus iti rehion.
Inlawlawagna pay no apay a nasapa a naduktalan ti kaadda ti UK variant ti COVID-19 iti Cordillera.
Sigun kenni Mayor Magalong, nasapa a naisumitir ti rehion Cordillera ti complete specimen a naikalikagum kadagiti regional offices ti DOH idi Disyembre para iti genome sequencing iti Philippine Genome Center.
