Maur-uray ti panang-aprobar iti Department of Environment and Natural Resources iti isingsingasing iti Municipal Environment and Natural Resources Office La Trinidad a panakaibangon iti forest library home learning center iti Puguis communal forest.
Iti panakiuman iti Bombo Radyo kenni Maria Angelica F. Tinoyan, Environmental Management Specialist 1 iti MENRO-La Trinidad, imbinglayna a panggep ti nasao a proyekto nga iyakomodar dagiti forest goers iti nasao a lugar, ken ipaayan dagitoy iti impormasyon seknan iti mabalin nga aramiden dagitoy tapno maaywanan ken masalakniban ti nasao a kabakiran.
Malaksid iti dayta, maaramat metlaeng ti forest library home learning center a pakaangayan dagiti nagduduma nga aktibidad iti nasao a munsipyo partikular dagiti environment projects kas kadagiti Information Education campaigns, ken agserbi kas venue iti orientations kadagiti volunteers a mangipatungpal iti tree planting activities.
Sigun iti nasao nga opsiyal, ti nasao a proyekto ket addanen iti approved budget a PhP500,000.//Bombo Genzel Depayso
