BAGUIO CITY – Kidkiddawen ti Department of Trade and Industry (DTI) ti panangibangon ti lokal a gobyerno ti Baguio iti Negosyo Center ditoy siudad.
Sigun kenni DTI Baguio-Benguet provincial director Freda Gawisan, babaen iti daytoy ket nalaklaka a maipaayan iti serbisyo dagiti babassit a negosyante ken dagiti indibidual a kayatna ti sumrek iti panagnegosyo.
Kinunana nga iti agdama ket temporary a maar-aramat kas Negosyo Center ti lokalidad ti paset ti opisinada sadiay Magsagsay ken sadiay a maak-akomodar dagiti kliyenteda a negosyante manipud siudad ti Baguio ken probinsia ti Benguet.
Impalawagna a no adda ti bukod a Negosyo Center iti siudad ket nalaklaka a maamuam ti panakairehistro dagiti barangay micro-business enterprises wenno BMBs a kas iti itudtuding ti linteg.
Sagudayen ti linteg a kasapulan a tunggal lokal a gobyerno ket maaddaan iti bukod a Negosyo Center tapnu maipaayan iti napintas a serbisyo dagiti negosyante.
Maipalagip nga idi kanikadua ket impaayab ti lokal a konseho ti Baguio ni Director Gawisan tapnu alaenda ti kapanunutan daytoy seknan iti panakabukel ti consumer welfare and protection council ken iti panaka-adaptar dagiti pagalagadan iti panagparehistro kadagiti BMBes iti lokadlidad.
