BAGUIO CITY – Imimbestigaran ti Municipal Environment and Natural Resources Office (MENRO)-La Trinidad ti iligal a pannakaibelleng dagiti Intravenous (IV) Tubes ken Syringe wenno medical wastes iti deppaar ti Shilan-Beckel-Lamut Road, La Trinidad, Benguet.
Sigun kenni Arthur Pedro, dadaulo ti MENRO-La Trinidad, agdagsen iti nasurok 195 a kilo ti IV Tubes ken syringe ti naakup dagiti kameng ti opisina dagitoy iti nasao a lugar nga asideg iti pagtataudan ti danum iti barangay Shilan.
Kinunana nga ammoda nu asino ti hauler ti naibelleng a basura ken nu ania nga ospital ti nagtaudan dagitoy nupay saanna pay a dinakamat ti pakabigbigan dagitoy.
Dinakamat ni Pedro a dudkuktalenda nu ti hauler ti basura wenno ti nagtaudan dagitoy nga ospital ti responsable iti nasao nga insidente.
Innayunna a malaksid iti La Trinidad ket adda met laeng ti naibelleng nga IV Tubes ken syringe sadiay Sablan, Benguet.
