BAGUIO CITY – ad-adalen ti lokal a gobyerno ti Bauko, Mt. Province ti posibilidad a maideklara ti entero a munisipyo kas maysa nga Environmental Critical Area Network (ECAN) a kas iti naaramid sadiay.
Sigun kenni Mayor Abraham Akilit, babaen iti daytoy ket magarantiyaan ti nasustinir nga aksion a panakaipreserba ken panakasalwad ti aglawlaw ti munisipyo manipud iti napartak a panakadadael.
Inlawlawagna a nasken a dumalan iti Kongreso ti panakaideklara ti Bauko kas maysa nga Environmental Critical Area Network isut gapuna a maisagsaganan dagiti detalye ti singasing a linteg para iti panakaisumitirna iti Kongreso.
Innayonna a konsultaenda dagiti umili no anya dagiti maipawil ken maipalubos sadiay tapnu adda ti balanse iti nagbaetan ti nakaparsuaan ken ti panagbiag dagiti umili iti munisipyo.
Naamuan a saksakupen ti Bauko ti kalawaan a paset ti Mount Data National Park ken addaan pakabuklan a kalawa a nasurok 34,000 nga ektarya a bukbuklen ti 22 a barangay.
