BAGUIO CITY – Maysa laengen a municipal government iti entero a Cordillera ti saan pay a nangipasa iti resolusyon a mangidekdeklara kadagiti miembro ti Communist Party of the Philippines-New People’s Army (CPP-NPA) kas persona non-grata iti lugar dagitoy.
Maipalagip a ti panangipasa dagiti provincial, municipal, city ken barangay LGUs iti nasao a resolusyon ket paset ti panagsuportarda iti Whole-of-Nation Approach tapnu magibusanen ti armed conflict iti pagilian.
Maibasar iti datus, iti entero a Cordillera ket maysa laengen a munisipyo iti Benguet ti saan pay a nangipasa iti kapada a resolusyon a mangidekdeklara kadagiti CPP-NPA kas persona non grata iti lugarda.
Naaramid met amin dagiti 1,178 a babbarangay iti rehion a mangipasa iti nasao a resolusyon.
Kabayatanna, agarup met iti P3.32-M ti gatad ti tulong a naipaayan kadagiti sigud a rebelde iti Cordillera iti sidong ti Enhanced Comprehensive Local Integration Program manipud Enero agingga Agosto ita a tawen.
Manarimaan pay ti konstruksion ti uppat a halfway houses para kadagiti rebel surrenderees a masarakan sadiay Abra, Apayao, Baguio City ken Ifugao.
