BAGUIO CITY – Temporaryo laeng ti pammilin a mangikalkalikagum iti panangiparang dagiti APORs iti negatibo nga RT-PCR test result tapnu mapalubusan dagitoy a makastrek ditoy siudad ti Baguio.
Sigun kenni Mayor Benjamin Magalong, temporaryo laeng a maipatungpal ti nasao nga pammilin agingga a saan pay a nagsubli iti normal ti sitwasyon ken awanen ti pangta ti Delta variant.
Maibasar iti pammilin, kasapulanen a mangiparang dagiti APORs a nagtaud kadagiti lugar nga adda iti sidong ti ECQ, MECQ ken GCQ ti negative result ti RT-PCR test tapno makastrekda ditoy siudad.
Kasapulan metlaeng a mangiparang iti negatibo a resulta ti RT-PCR test dagiti APORs a nabakunaanen ken saan pay a nabakunaan.
Dinakamatna a kadagiti met APORs a nagtaud iti Modified General Community Quarantine ket mapalubusan a mangiparangda iti antigen test result wenno mabalin a nga agpaisidongda iti test iti central triage.
Innayon ni Mayor Magalong a mapalubusan met ti iseserrek dagiti returning Baguio residents ditoy siudad ngem nasken a mangiparangda iti kaskenan a dokumento.
Inlawlawagna manen nga amin dagitoy ket paset ti panagannad ti Bagiuo kontra iti Delta variant.
