BAGUIO CITY – Agtultuloy ti panangikampanya ti Overseas Workers Welfare Administration (OWWA) iti “Balik Pinas! Balik Hanapbuhay!” Program ti ahensia kadagiti overseas Filipino workers (OFWs) iti nagduduma a paset ti rehion Cordillera.
Sigun kenni OWWA-Cordillera Regional Director Evelyn Laranang, naiyusuat ti nasao a programa idi 2013 tapnu matulongan dagiti OFWs a pasubli ditoy pagilian kalpasan a naawanan dagitoy iti trabaho sadiay ballasiw-taaw gapu iti nagduduma a rason, kas iti panagbalinda a biktima ti kinaranggas.
Kinunana nga agtultuloy ti panagrikos dagiti personnel ti OWWA iti nagduduma a paset ti Cordillera tapnu maipaka-ammo kadagiti maseknan nga OFWs ken kapamilya dagitoy ti panagnumarda iti nasao a programa.
Sagudayen ti programa a mabalin nga agnumar ditoy dagiti kwalipikado nga OFWs iti uneg ti tallo a tawen ken ditoy a maka-awatda iti P20,000 kas financial assistance a mabalin nga aramatenda iti panangibangonda iti negosyo iti lugarda tapnu saandan nga agsubli iti ballasiw-taaw.
Nupay kasta, dinakamatna nga adda latta dagiti umili iti rehion ti agsubsubli sadiay ballasiw-taaw gapu iti tarigagay dagitoy a maaddaan ti napimpintas a masakbayan.
Sigun pay kenkuana, saan nga amin nga OFWs ket addaan iti napintas a trabaho ken amo sadiay ballasiw-taaw.
