Umdas ti suplay ti higland vegetables kagiddan ti panakaobserbar ti Holy week.
Iti panakiuman ti Bombo Radyo kenni Elsie Gis-it, Benguet Agri-Pinoy Trading Center (BAPTC) Adviser, impasiguradona nga adda ti nateng ken saan nga agkurang ti mailako a natnateng iti merkado.
Sigun kenni Gis-it, normal ti operasyon dagitoy iti laksid nga umadanin ti semana santa.
Nupay kasta, kinuna ni Gis-it a matumal ti panangilakoda kadagiti highland vegetables nangruna ket bassit ti gumatgatang kadagitoy sadiay Metro Manila.
Inlawlawag ti nasao nga adviser nga awan met ti naipakaamo kadakuada nga adda ti mapaspasamak a kompetisyon nangruna kadagiti imported a produkto.
Gapu iti nababa a demand kadagiti nateng ket bimmaba met ti presyo dagitoy no sadino ti patatas ket dumanon iti P40 ti tunggal kilo daytoy.
Kinuna ni Gis-it a mas ad-ado dagiti kustomers dagitoy idi napalabas no idilig iti agdama a tawen.
Ngem, babaen iti “tawid dagat” ket mas lumawlawa ti masup-suplayan dagitoy iti highland vegetable.
Ti” tawid dagat” ket dagiti lugar a kaiturturungan dagiti nateng babaen iti water transportation kas kadagiti lugar a Palawan, Iloilo, wenno dagiti nagduduma a paset ti Visayas ken Mindanao.
Kinuna ni Gis-it a no mapan laeng iti divisoria ti Metro Manila dagiti nateng dagitoy ket bassit ti mailakoda.
Iti agdama, ti probinsya ti Benguet ti kangrunaan pay laeng a pagtataudan dagiti highland vegetables.