Inlawlawag ni Independent Commission for Infrastructure (ICI)Special Adviser Rodolfo Azurin a nakadepende kenni President Ferdinand Marcos Jr. ti pagbanagan ti nasao a komisyon nu mailaylayon pay ti mandato daytoy nga agimbestigar kadagiti naanomalyaan a flood control projects wenno maisardengen iti mabiit.
Daytoy ket kasaruno ti panaglusulos ti dua a member-commissioner ti nasao a komisyon idi napan a tawen kasta metten ti immuna a naipakaammo nga agleppas daytoy inton Pebrero.
Sigun keni Azurin, awan pay ti naawatda a pammilin manipod iti opisina iti presidente maipapan iti panagtalinaed ti mandato ti ICI.
Nupay kasta, kinuna ti opisyal nga iti agdama ket agtultuloy latta ti panagimbestigarda kadagiti naanomalyaan a flood control projects.
Maipalagip nga idi September 2025 ket binukel ni President Marcos Jr. ti Independent Commission for Infrastructure (ICI) kasaruno ti panangipukkaw dagiti umili iti panakadusa dagiti korap nga opisyales a responsable iti binilbilyon a balor dagiti naanomalyaan a proyekto iti pagilian partikular dagiti flood control.
