Mailaylayon pay agingga ngudo iti Abril sakbay a malpas ti tennis court sadiay Baguio Athletic Bowl.
Iti panakiuman iti Bombo Radyo kenni Eric Estanislao, site architect iti nasao a tennis court, 90% itan ti nalpas iti pakabuklan iti pasilidad pakairamanan ti parking area ken ti panganan iti daytoy.
Sigun kenni Estanislao,naituding a malpas koma daytoy inton April 15 ngem mailaylayon daytoy gapu kadagiti sumagmamano nga additionals para iti daytoy.
Iti agdama, manarimaanen ti final touch iti nasao a pasilidad kas iti panakapintor iti grounds iti tennis court.
Maisaruno met ti panakaimuntar dagiti bleachers ken daduma pay a kasapulan iti nasao a court.
Maur-uray laeng metten a mamagaan a maminpingsan ti pintura iti parking area nga immunan a naileppas.
Mainaig iti dayta, kinuna ti site architect a dimmalan dagitoy iti adu a karit bayat ti panagaramidda iti nasao a pasilidad kas iti sasaaden iti panawen.
Apaman a maminpingsan a malpas ti proyekto ken maiturn-over, manamnama a mailukat para iti publiko maitunos kadagiti mapagnunumwan paylaeng a pagalagadan seknan iti panagaramat iti daytoy.//Bombo Noveh Organo
