BAGUIO CITY – Tarigagay ti munisipyo ti Tuba, Benguet a mailukat ita a tawen ti maysa kadagiti kweba dagitoy wenno ti Aran Cave a daydaywen dagiti tattao.
Segun kenni Annabelle Solano, municipal tourism officer ti nasao a munisipyo, namnamaenda a mailukat ti kweba nupay adu ti nasken nga aramiden dagitoy kas iti comfort room, visitors center ken dadduma pay.
Naamuan met nga inimbitaran ni Mayor Ignacio Rivera dagiti geologist manipud Philex Mining Corp. tapnu kitaenda ti nasao a kweba.
Malaksid iti daytoy ket maururay metlaeng ti panagsangbay dagiti bisita manipud El Nido, Palawan tapnu ibinglay dagitoy ti kapadasanda iti panangisimpa dagitoy iti underground river sadiay.
Maipalagip nga imparikep ni sigud a mayor Florencio Bentrez ti Aran Cave gapu iti inut-inut a pakadadael daytoy.
