BAGUIO CITY – Impalubosen ti Provincial Anti-Covid19 Task Force ti Abra ti panakailukat manen ti tourism industry iti entero a probinsia.
Nupay kasta, linawlawagan ti dadaulo ti task force a ni Governor Maria Jocelyn Bernos a mabalin latta a suspindiren dagiti LGUs ti amin a tourism activities iti masakupan dagitoy no makitada ti pagkasapulan para iti nasao nga addang.
Kinunana a depende ti panakasuspindir dagiti aktibidad ti turismo iti sitwasyon ti COVID-19 iti lugar dagitoy.
Innayonna a dagiti laeng umili ti Abra ti maakomodar kadagiti pagpasyaran sadiay ken nasken a nainget a masurot dagiti health protocols.
Naamuan nga iti agdama ket nailukaten ti nalatak a Kaparkan Falls a masarakan sadiay Caganayan, Tineg para laeng kadagiti taga-Abra.
Karaman pay a nailukat ti Lusuac Spring Resort sadiay Lagayan bayat a maisimsimpan dagiti pagalagadan para iti panakailukat ti Piwek Rock Formations ken Vira Caves sadiay.
