BAGUIO CITY – Ikonkonsidera itan ti ili ti Tublay, Benguet ti panakailukat dagiti nagduduma a tourist spots sadiay.
Kasaruno daytoy ti panaglukat ita nga aldaw dagiti kangrunaan a parke ditoy Baguio kadagiti umili ti siudad ken iti panggep ni Mayor Benjamin Magalong a panakairaman ti LISST area iti panagsubli iti operasyon dagiti lugar a pagpasyaran.
Iti panakiyuman ti Bombo Radyo Baguio kenni Tublay Mayor Armando Lauro, kinunana a naituding nga agtaripnong ti lokal a gobierno ken dagiti tourist destination owners tapno mapagnumuan dagiti aramidenda nga addang para iti plano a panaglukat manen ti turismo iti munisipyo.
Dinakamatna a kalpasan iti daytoy ket maiparang kadagiti walo a babbarangay ti Tublay ti nabukel a desision para met iti konsultasion.
Inyunay-unayna a masapol a maiparang iti publiko ti napagnunumuanda kadagiti nagduduma nga stakeholders tapno mangipaayda iti opinion ken pakaseknanda para iti nasao a banag.
Sigun pay kenni Mayor Lauro, posible a mailukat kadagiti lokal a turista dagiti nagduduma a pagpasyaran ti munisiyo inton Oktubre wenno Nobyembre.