BAGUIO CITY – Kinarit ni Rev. Fr. Mario E. Tambic, Director ti Commission on Environment ti Diocese of Baguio dagiti maseknan nga ahensya seknan iti panakaimanihar dagiti espasyo ti Baguio City para iti panagdakkel dagiti maimulmula a pinetree.
Iti panakiuman ti Bombo Radyo kenni Rev. Fr. Tambic, narigaten a maawagan a City of Pines ti siudad ti Baguio gapu ta adun dagiti naputed a pinetree.
Sigun kenkuana, in-inut nga agbalbaliw ti aglawlaw nga ipampannakkel ti siudad gapu metlaeng iti nagbaliw a panagkita dagiti sumagmamano a tao iti maawagan a progreso.
Innayona pay nga arigna ket para laengen iti dokumentasyon dagiti maipatpatungpal a panagmula ti kayo nu sadino sumagmamano kadagitoy ket mabaybay-an metlaeng kalpasan ti panakaimulada.
Gapu iti dayta, maipalpalagip iti publiko ti akem dagitoy para iti panangaywan iti aglawlaw.
Kabayatanna, imbinglay ti nasao a padi nga adda dagiti programa a binukel ti Diocese of Baguio a makatulong iti panangsalwad ken panangpapintas iti aglawlaw kas ti panangimandato kadagiti agassawa nga agmula dagitoy ti kayo bayat ti panagkallaysada.//Bombo Rob Dominguez
