BAGUIO CITY – Manarimaan ti panakaimbentaryo ken panakainspeksion dagiti nagduduma a Community Police Assistance Center (COMPAC) iti masakupan ti probinsia ti Benguet.
Iti interview ti Bombo Radyo Baguio kenni Reynaldo Pasiwen, dadaulo ti Benguet Police Provincial Office (PPO), kinunana a paset daytoy ti planoda a re-activation dagiti saan nga aktibo a COMPAC.
Kinunana a matarimaan pay dagiti pasilidad a nasken a maisimpa sakbay a ma-reactivate dagiti nasao a COMPAC.
Inlawlawagna a panggepda a biyagen dagiti COMPACs iti probinsia kasaruno ti panagngato dagiti kaso ti panagtakaw iti lokalidad iti naglabas a bulbulan.
Dinakamatna a naobserbaranda a sumagmamano a COMPAC iti probinsia ti saanen nga aktibo nangruna ita a pandemya.
Sigun kenkuana, kasapulan a mabiag manen dagiti naabandona a COMPAC tapno nainget a mabantayan dagiti crime prone areas iti probinsia ken mapalaka ti panagresponde dagiti pulis kadagiti nagduduma a kita ti krimen.
Sigun pay kenkuana, kangrunaan a mailislistada ita ti kaso ti panagtakaw kas iti akyat-bahay.
Impanamnama pay ni Col. Pasiwen nga umdas ti pwersa ti Benguet PPO nga agbantay kadagiti ma-reactivate a COMPACs iti probinsia.