BAGUIO CITY – Manamnama a malpas ita a tawen ti panakaimuntar ti Light Emitting Diodes (LED Lights) iti siduad ti Baguio babaen iti Engineerings Office.
Sigun kenni Engineer Richard Molina, dadaulo ti Electrical Division ti City Engineerings Office, 90% ti naimuntaren a LED lights iti siudad.
Kinunana a ti nabatbati a 10% a saan pay a nalpas ket masarakan kadagiti kadakkelan a barangay kas ti Irisan, Bakakeng Central ken daduma pay.
Immunan a nadakamat a dumanon iti P3-M ti binulan a baybayadan ti siudad kadagiti High Pressure Sodium (HPS) Streetlights isut gapuna a napagdesisyonan ti panakasukat dagitoy iti LED Lights.
Impanamnama ni Molina nga apaman a maimuntar amin dagiti LED lights kadagiti nagduduma a paset ti siudad ket bumaba iti 50% wenno P1.1-M ti bayadan ti siudad tunggal bulan.
Impasiguradona pay a napinpintas ti LED light no idilig iti HPS streetlights gaputa at-atidog ti life-span daytoy.
Maipalagip nga inreklamo dagiti barangay officials ti napartak a panakapundi dagiti HPS bulb isut gapuna a narugian ti panakaimuntar dagiti LED lights. (with Bombo Brigit Marcasi)
