Inrekomendar ti Commission on Audit (COA) ti naing-inget nga addang, pakairamanan ti panangiparit ti sueldo ken panangipaay iti pannusa kadagiti opisyales ti Department of Education (DepEd) a saan a nang-liquidate iti cash advances (CAs) nga aggatad iti agarup Php 6.96 billion agingga idi December 31, 2023.
Iti 2023 Annual Audit Report, in-flag ti COA ti saan a nainget a panangtungpal ti DepEd kadagiti paglintegan ken pagannurotan a nagresulta iti panakaurnong dagiti unliquidated a cash advances (CA).
Karaman kadagiti kangrunaan a pagkurangan ti panangipaay kadagiti CA nga awan ti umno nga otoridad ket ti panangiyakar iti pondo iti nagbaetan dagiti accountable officers (AOs), saan a nasayaat a panangi-bond kadagiti AO, ken panagbayad kadagiti gastos a kas iti Service Recognition Incentives (SRI) babaen kadagiti CA imbes a direkta a bayad.
Maibasar iti report, dagiti kangrunaan a rehion nga addaan ti kangatuan nga “unliquidated balances” ket pakairamanan dagiti sumaganad:
Region VII (Central Visayas) : 1.31 billion
Region VIII (Eastern Visayas): 1.01 billion
Region XII (SOCCSKSARGEN): 819.4 million
Region IX (Zamboanga Peninsula): 537.1 million
Region VI (Western Visayas) : 513.9 million
NCR (National Capital Region): 301.9 million.
Tapno marisut daytoy, inrekomendar ti COA dagiti sumagmamano nga addang.
-Isardeng ti panangipaay kadagiti baro a cash advance kadagiti opisial nga addaan iti pending balance.
-Mangipaulog kadagiti demand letter kadagiti aktibo nga empleado tapno mapilit ti liquidation.
-Isardeng dagiti sueldo ken “dues” dagiti “delinquent AOs” agingga a mabayadan dagiti obligasion.
-Mangipakat kadagiti kaskenana a pannusa iti sidong dagiti pagannurotan ti Civil Service Commission (CSC) para kadagiti “delays”
-Isurat dagiti dormant account a saan pay narisut iti nasurok a sangapulo a tawen.
Napaliiw met ti report nga iti dadduma a kaso, dagiti saan pay a nabayadan a balanse agraman dagiti accountable officers a nagretiro, nagikkat, AWOL, wenno nayakar, nga ad-adda a nangparikut iti proseso ti panagrekober.
