BAGUIO CITY–Saan a rumbeng a maipaayan iti amnestiya dagiti taxpayers a nabayagen a saan a nagbaybayad ti buis iti lokal a gobyerno ti siudad ti Baguio.
Impetteng daytoy ni Mayor Mauricio Domogan kagiddan ti panangkunana a dakkel a pukaw iti koleksiyon ti siudad ti maikiskissay nga interes ken penalty a rumbeng kuma a masingir manipud kadagiti nasao a taxpayers.
Inyunay-unayna a ti maiparbeng a maipaayan iti gunguna wenno amnestiya ket dagiti taxpayers nga agbaybayad ti buis iti umno nga oras tapnu maguyugoyda pay a mangbayad iti pagrebbenganda iti lokal a gobyerno ti Baguio.
Kinunana a ti panagbayad ti buis ket pagrebbengan ti publiko ngem no mamingsan ket adda dagiti indibidual a saan nga agbaybayad iti pagrebbengan dagitoy.
Kabayatanna, impannakkelna a sumaysayaat ti revenue collection ti City Treasury Office nga agserserbi met a basaran iti panakaipaluspos ti pondo ti siudad.
Maipalagip nga immunan nga inaprobaran ti lokal a konseho ti siudad ti panakaipaay ti amnestiya kadagiti deliquent taxpayers tapnu maguyugoyda a mangbayad iti buis a nabayagen a saanda a binaybayadan iti gobyerno.
