BAGUIO CITY – Mangrugin inton Lunes, November 15 ti panangipaay ti siudad ti Baguio iti booster shots kadagiti healthcare workers ken senior citizens.
Kagiddan iti daytoy, impanamnama ti mayor ti siudad ti kaadda ti umdas a suplay ti bakuna para iti booster shots.
Dinakamatna nga agsobsobra ti bakuna a maaw-awat ita ti siudad isut gapuna a mangit-ited daytoy iti bakuna kadagiti dadduma a lugar kas iti dadduma a munisipyo iti Cordilleras, Region 1 ken Region 3.
Malaksid iti daytoy, impasiguradona pay nga umdas metlaeng ti suplay ti bakuna para kadagiti menor de edad wenno dagiti agtawen ti 12-17 a kayatda ti agpabakuna kontra iti COVID-19.
Iti kaudian a rekord ti Baguio LGU, 90.2% wenno agarup 253,500 iti eligible adult population ti siudad ti naipaayan ti agarup maysa a dose ti bakuna kontra iti COVID-19 bayat a 72.13% wenno nasurok 202,700 iti eligible adult population ti fully vaccinated ken 36.75% wenno 15,735 manipud iti nasurok 42,800 a targeted pediatric population ti naipaayan ti first dose.
