BAGUIO CITY – Dumanonen iti 77 nga aplikasyon para iti Project EASE wenno Educational Assistance through Scholarships in Emergencies ti Overseas Workers Welfare Administration (OWWA) – Cordillera.
Sigun kenni OWWA-Cordillera Regional Director Manuela Peña, puntirya ti Project EASE a maipaayan iti P10, 000 a tinawen nga education assistance iti uneg ti agingga uppat a tawen dagiti kwalipikaso nga annak dagiti aktibo a miembro ti OWWA a nagawid ditoy pagilian gapu iti COVID-19 pandemic.
Kinunana a manipud iti 77 nga aplikasyon ket 16 ti naaprobaranen ken 10 a benipisaryo ti nakaawaten iti tulong pinansial para iti agdama nga academic year.
Naamuan a dumanon iti P400-M ti inlatang ti OWWA para iti nasao a tulong pinansial iti edukasyon dagiti annak dagiti OFWs a miembro ti ahensia nga inapektaran ti agdama a pandemya.
Innayon pay ni Peña nga agtultuloy metlaeng dagiti dadduma nga education assistance ti ahensia kas iti Educational for Development Scholarship Program, Education and Livelihood Assistance Program ken ti Congressional Migrant Workers Scholarship Program.
Agpaso met ti aplikasyon para iti Educational for Development Scholarship Program ti OWWA inton tapos ti bulan ti Disyembre.
Kabayatanna, agtultuloy ti panangasistar ti OWWA – Cordillera kadagiti returning OFWs ditoy rehion kalpasan a naapektaranda iti agdama a pandemya.
Maibasar iti datus ti ahensia manipud May 1 agingga October 5, dumanon iti agarup 4,300 nga OFWs a nagawid ditoy pagilian ti tinulongan daytoy.
Bukbuklen daytoy ti 618 a returning OFWs sadiay Abra; 180 iti Apayao; 1,652 iti Baguio City, 954 iti Benguet, 352 itiIfugao, 331 iti Kalinga ken 206 iti Mountain Province.
Kabayatanna, dumanon met iti 2,635 ti bilang dagiti nagawid nga OFWs ditoy rehion a nagnumar iti Abot-Kamay Ang Pagtulong Program.
