BAGUIO CITY – Narugianen ti panangipaay ti lokal a gobyerno ti Baguio ti insentibo kadagiti senior citizens iti siudad a nakipaset iti vaccination program ti gobyerno.
Naipaayan iti libre a grocery packs ken bitamina dagiti nasao a senior citizens.
Indauluan met ti mobile vaccination team ti Baguio ti panakaipaay ti nasao nga insentibo.
Sigun kenni Councilor Micheal Lawana, maipaayan metlaeng iti gunguna dagiti barangay iti siudad a makailista iti kangatuan a vaccination rate wenno bilang dagiti senior citizens iti masakupanda a mabakunaan kontra iti COVID-19.
Kinunana a mangipatungpalda ti assessment iti ngudo ti agdama a bulan kadagiti babbarangay.
Imbinglayna a dumanon iti P50,000 ti maawat ti barangay nga addaan ti kangatuan a vaccination rate bayat a P30,000 iti maikadua ken P20,000 iti maikatlo.
Makaawat met iti sag-P5,000 a consolation prize dagiti nabatbati a babbarangay.
Iti agdama, masapsapol paylaeng ti 3,300 a nabatbati a senior citizens ditoy siudad a saan pay a nabakunaan kontra iti COVID-19.
