BAGUIO CITY – Iyap-apela ti lokal a gobyerno ti Itogon, Benguet ti panakaipaay ti umdas a suplay ti relief packs manipud iti DSWD-Cordillera para kadagiti pamilya a maipaspasidong iti quarantine gapu iti panakailista ti COVID-19 sadiay.
Iti panakiyuman ti Bombo Radyo, kinuna ni Mayor Victorio Palangdan nga agkurkurang ita dagiti relief packs nga iwarasda kadagiti naipasidong iti lockdown gapu iti killaat a panagngato ti COVID-19 sadiay.
Sigun kenkuana, naibus metten ti buffer stock ti munisipyo iti relief goods isut gapuna a kasapulanda ti kanayonan a tulong manipud iti DSWD ken dadduma pay a maseknan nga ahensya.
Iti agdama, dumanonen iti 512 ti pakabuklan a bilang ti kaso ti COVID-19 sadiay Itogon a bukbuklen ti 82 a naimbagan, 426 nga aktibo ken 4 nga ipupusay.
Nakasagana met ti DSWD-Cordillera a mangited iti kidkiddawen ni Itogon, Benguet Mayor Victorio Palangdan a kanayonan a family food packs para kadagiti pamilya sadiay a naipasidong iti COVID-19 quarantine.
Impanamnama daytoy ni DSWD-Cordillera regional director Leo Quintilla iti interview ti Bombo Radyo Baguio.
Sigun kenkuana, idi napalabas a lawas ket adda ti 1,000 a family food packs a naisagana ken naitulod para iti Itogon ken 500 a family food packs par iti Tuba a paset ti Oplan Tuba and Itogon.
Kinunana nga agisagsaganada pay ti personal protective equipment ken dadduma a pagkasapulan ti munisipyo tapnu maipasigurado ti umno a panagresponde iti COVID-19 cases.
Dinakamatna nga agpaut iti dua agingga tallo nga aldaw dagiti food packs para iti maysa a pamilya a bukbuklen ti lima nga indibidual.
Kinuna pay ni Quintilla nga agtultuloy ti panangtulongda iti Itogon agingga nga adda ti pagkasapulan para iti panang-augment iti resources ti lokal a gobyerno.