BAGUIO CITY – Inyunay-unay ni Mayor Benjamin Magalong a ti original proponent status (OPS) laeng ti naipaay iti SM Prime Holdings ken saan a ti opisyal a lisensia tapnu idaulo ti panakapabaro wenno modernisasyon ti Baguio City Public Market.
Inlawlawagna a saan pay a nangabak ti nasao a kompanya ken ti laeng naited iti daytoy ket ti OPS a mangipablaak iti disenyo ken mangirugi kadagiti negosasyon para iti public-private partnership (PPP) deal iti city market project.
Kinunana nga atiddog a proseso ti panagpili iti kasayaatan a kompanya a mangimplementar iti proyekto iti merkado publiko ken ti panangipaayda iti OPS iti nasao a kompanya ket rugrugi laeng.
Innayonna a no mapaay ti negosasyon iti SM ket saanen a maituloy ti katulagan ngem no agballigi ket mapagnumuan pay ti disenyo ken dagiti amin a kondisyon a nasken a matungpal sakbay ti panaka-aramid ti terms of reference.
Apaman a maaprobaran ken maipablaak ti mabukel a terms of reference ket mabalin a makipaset dagiti kompanya iti proseso a maawagan ti ‘Swiss Challenge’, no sadino, nasken nga artapan ti SM ti mapili a best proposal manipud kadagiti nakipartisipar a kompanya.
Innayon ni Mayor Magalong nga agpaut ti proseso iti agingga lima a bulan sakbay a makompleto ken mapili ti mangabak para iti nasao a proyekto.
