BAGUIO CITY – Kidkiddawen dagiti pamilya a napapanaw iti BIBAK area sadiay Harrison Road, siudad ti Baguio ti panangaprobar ti Sangguniang Bayan ti La Trinidad, Benguet iti development and building permit ti panggep a subdibisyon a para kadakuada sadiay Longlong, Puguis.
Naamuan a dumanon iti 235 a pamilya dagiti napapanaw iti BIBAK area ken dagitoy ti nangbukel iti Montañosa Homeowners Subdivision, Inc.
Immuna metten nga inaprobaran ti lokal a konseho ti munisipyo ti locational clearance ti lote a maaramat para iti housing project ken babaen iti survey a naisayangkat ita a bulan ket naamuan a natalged ti disso.
Naipabiang ti nasao a kiddaw dagiti pamilya iti Committee on Zoning, Urban and Rural Development ti Sangguniang Bayan ken manamnama a dagus a mapaayaban dagiti maseknan nga indibidual iti kanito a matalantan iti konseho ti pakaseknan.
Naamuan a dumanon iti P23-M ti bayadan ti Social Housing Finance Corporation iti agtagikua ti lote nga aglawa iti 21,483 square meters a pagnaedan ti saan a sumurok iti 300 a pamilya.
Naituding met nga ag-utang dagiti pamilya iti nasao a korporasyon iti P400,000 para iti pabalay dagitoy.