BAGUIO CITY – Maipaayan iti alternatibo a panggedan kadagiti nasurok 12,000 a minero a maapektaran iti panakaisardeng dagiti amin nga small scale mining operations iti entero a rehion Cordillera.
Impasigurado daytoy ti Malacañang kasaruno ti panangibilin ni Environment Secretary Roy Cimatu iti panakaisardeng ti amin nga aktibidad ken operasyon ti small scale mining iti entero a region gapu iti napasamak sadiay Itogon, Benguet.
Sigun kenni Presidential Spokesperson Harry Roque, irekomendarda ti panakaipatungpal ti cash-for-work program babaen ti Department of Social Welfare and Development, Department of Labor and Employment ken ti Department of Agriculture.
Kinunana a makikoordinarda met laeng iti Technical Education and Skills Development Authority tapnu maipasidong iti skills training dagiti apektado a minero tapnu saanda laeng a nakadependar iti panagminas.
Innayonna maiturong iti munisipyo ti Itogon, Benguet ti Build Build Build = Jobs Jobs Jobs Caravan tapnu maipaayan dagiti umili iti panawen nga agtrabaho iti Build Build Build Program ti administrasyon gaputa agkurkurang ti manpower.
Immuna metten a kinuna ni Sec. Cimatu nga irekomendarda ti panagsubli dagiti minero iti nagtaudan dagitoy a probinsya tapnu maisubli metlaeng ti kinatalged ti Itogon, Benguet.
