Inyunay-unay ni Police Lieutenant Colonel Benson Macli-ing, Acting Chief of Police ti Tabuk City Police Station iti publiko ti diretso a panagreport dagitoy iti istasyon iti pulisya kadagiti pakaseknanda ken saanda nga ipablaak laeng iti social media.
Iti panakiuman ti Bombo Rayo kenno Macli-ing, kinunana a nu mabalin ket saan nga idalan ti publiko ti pakaseknanda babaen iti panangipablaak iti social media a pakairamanan ti panakatakaw dagiti alikamen dagitoy ken ti maipapan iti iligal a droga.
Sigun kenni Macli-ing, ado dagiti maipabpablaak iti social media a problema ngem saan met a maipakpakaamo daytoy kadakuada rason a saan a marisrisut.
Gapu iti dayta, inyunay-unayna a tapno mapaneknekan a pudno dagiti maipabpablaak ken tapno marisut daytoy ket iti opisina ti pulis ti pagturongan ti publiko.
Iti sabali a bangir, ti Kalinga ti maysa a probinsya a bambantayan ti Philippine National Police ken ti Philippine Drug Enforcement Agency (PDEA) gapu ta ado dagiti matiltiliwan iti iligal a droga kasta met nga ado a marijuana eradication ti maisaysayangkat.
Kinuna met ni Macli-ing nga adda dagiti inteligence personnels a nakamonitor iti nasao a lugar tapno mabantayan dagiti transaksyon maipapan iti droga kasta met a maipatpatungpal ti checkpoint ken search warrant.//Bombo Mera Pacpacan
