Supsuportaran iti Securities and Exchange Commission (SEC) ti panakaipaiyulog iti freeze order kadagiti assets ken bank accounts dagiti indibidwal a karaman kadagiti naanomalyaan a flood control projects.
Sigun kenni SEC chairperson Francis Lim, ti nasao a tignay ket maysa nga addang paturong iti umno a direksyon iti panagregget ti gobyerno a paksyaten ti mapaspasamak a korapsyon.
Maipalagip nga idi laeng Martes ket inwaragawag iti Anti-Money Laundering Council (AMLC) ti panangipaiyuog daytoy iti freeze order kalpasan nga inaprubaran iti Court of Appeals (CA).
Sigun kenni AMLC Executive Director Atty. Matthew David, saklawen ti nasao a freeze order ti 135 bank accounts ken 27 insurance policies dagiti indibidwal ken korporasyon.
Iti impatungpal ti AMLC nga inisyal nga inspeksyon, posible nga adda ti mapaspasamak a money laundering scheme kadagiti pondo iti gobyerno a nailatang para kadagiti flood control projects.
Malaksid ti nasao nga opisina, mangipatpatungpal metlaeng ti Bangko Sentral ng Pilipinas(BSP) iti imbestigasyon kas maitunos iti Anti-Financial Scamming Act (AFASA) a mangimanmandato iti panakahold dagiti pondo iti las-ud iti 30 nga aldaw.
Immuna metten nga imbinglay ni Department of Public Works and Highways (DPWH) Secretary Vince Dizon a ti nagnagan dagiti 26 a karaman iti freeze order ket isu metlaeng dagiti sumangsango iti kaso a graft iti Office of the Ombudsman.
