BAGUIO CITY – Umap-apela iti tulong ti Liga ng Transportasyon at Operator ng Pilipinas-Cordillera and Region 1 kadagiti local officials ken iti ti Department of Transportation (DOTr) – Land Transportation Franchising and Regulatory Board (LTFRB).
Iti interview ti Bombo Radyo Baguio kenni Froilan Marquez, Vice President ti nasao a liga, impettengna a kaasi dagiti parapasahero a bus ken dagiti UV Express iti lokalidad nangruna dagiti agbibiahe iti inter-region gaputa awan pay ti nailukat ken naipalubos a biyahe dagitoy.
Kinunana a dagiti met dadduma a parapasahero a jeeo iti Baguio ket adda iti ‘break even’ a sitwasyon bayat a madaddadael dagiti dadduma nga yunit dagiti parapasahero a bus gaputa saan dagitoy a napatpataray iti nasurok makatawen a saanda a panagbiahe.
Kinuwestionaranna met ti saan a panakaipalubos ti panagbiaheda idinto ta adu dagiti makalkalsut nga agbibiahe ti ruta dagitoy, nangruna kadagiti inter-regional wenno dagiti sumrek ken rumwar iti rehion Cordillera.
Partikular a tarigagayda a mapalubusan nga agbiahe ket dagiti kakadwada iti transport sector nga addaan laeng ti single franchise iti ruta a paturong iti nagduduma a probinsia iti Ilocos Region.
Iti baet daytoy, pinagyamanna met latta ti gobyerno iti tulong a naawat dagiti kameng ti grupoda no sadino, dumanon iti tallo ribo a drivers dagitoy ti agur-guray iti tulong pinansial manipud iti Department of Tourism.