BAGUIO CITY – Maur-uray paylaeng ti desisyon dagiti maseknan a local government units (LGUs) iti ruar ti Baguio no maipalubos ti panagbiahe dagiti parapasahero a lugan nga addaan ruta ti Baguio City paturong kadagitoy.
Iti panakiuman ti Bombo Radyo Baguio, inlawlawag ni Land Transportation Office – Cordillera regional director Francis Ray Almora a kasapulan nga agtunos ti LGU a pagtaudan ti biahe ken ti LGU ti destinasyon sakbay a mapatgan ti panagbiahe ti maseknan a lugan.
Innayonna a nasken pay a dagiti dua nga LGUs ket naka-general community quarantine tapnu mapalubosan ti panagbiahe kadagitoy.
Dinakamatna a naaprobaranen ti ruta ti Baguio-Nueva Ecija ngem saan a natuloy idi ti biahe gapu iti travel restrictions.
Kinuna pay ni Almora nga adda dagiti UV Express a nakaalan ti pammalubos manipud iti LTFRB Central Office para iti panagbiaheda ngem manarimaan paylaeng a mainegnegosasyon ti panagrugi ti biaheda kadagiti maseknan a destinasyon nga LGUs.
Naamuan metlaeng nga addan ti nabayagen a petisyon para iti biahe a paruar iti Baguio City paturong sadiay La Union, Pangasinan ken Nueva Ecija malaksid pay kadagiti tourist vans.
