BAGUIO CITY – Kidkiddawen dagiti opisyales ti Baguio ti panangipalubos dagiti hotels iti panakaimuntar ti stalls wenno booths iti espasyo iti masakupan ti pasdek dagitoy.
Iti Resolution No. 540, nailanad a dagiti stalls ket abangan dagiti kwalipikado ken rehistrado a retailers ken sellers ti souvenirs, delicacies ken pasalubong.
Paset daytoy ti agdama a kampanya para iti in-inot ken natalged a panakabiag ti ekonomiya ti siudad.
Sigun kadagiti opisyales ti siudad, sakbay pay ti pandemya ket siguden a maipalpalubos ti panagilako ti souvenir wenno delicacies ken pasalubong iti aglawlaw dagiti hotels iti siudad tapnu nalaka a paggatangan dagiti turista ken dadduma a kustomer.
Nadutukan iti nasao a resolusyon ti Permits and Licensing Division, Public Order and Safety Division ken Hotel and Restaurant Association of Baguio a mangaramid ti umno a pagalagadan, criteria ken program components kas iti bilang dagiti makwalipikar iti nasao a programa, ti makolektar nga abang kadagitoy ken ti masurot a public health standards.
Sigun pay kadagiti opisyales ti siudad, maysa kadagiti kangrunaan a naapektaran iti panakaimplementar ti nagduduma a lebel ti community quarantine tapnu malapdan ti panagwaras ti COVID-19 ket ti retail sector a nakairamanan dagiti retailers ken agilaklako ti souvenirs, delicacies ken pasalubong.
