BAGUIO CITY- Impalubosen dagiti umili ti Itogon, Benguet ti panggep a pannaka-ipangato manen ti tailings Storage Facility (TSF) 2 ti Benguet Corporation sadiay.
Kinumpirmar daytoy ni Itogon Mayor Victorio Palangdan iti interview ti Bombo Radyo Baguio.
Sigun kenkuana, addan ti pinirmaan a katulagan ti nasao a kompanya ken dagiti umili ti Itogon tapno maituloy ti operasion ti Benguet Corp kalpasan a naipaima iti korte ti nasao a banag.
Inaklon pay ti mayor nga immanamong ti kompanya kadagiti inlatang a kondision dagiti umili kas iti limitasion ti kauneg ti tailing dam, ken dadduma a pagalagadan ti panakaaramid dagitoy iti tunnel ken spillway.
Kinuna pay ni Mayor Palangdan nga adda ti maipaay nga insentibo kadagiti umili ti tallo a barangay sadiay manipud iti kompanya.
Maipalagip a naisayangkat ti misa, ritwal ken tignay-protesta dagiti residente iti lower downstream communities Itogon idi napalabas a tawen tapnu kiddawen ti proteksion para iti nakaparsuaan ken tapno tubngarenda ti plano ti nasao a kompanya.
Immunan met nga inlawlawag ni Mayor Palangdan a ligal ti panggep a pannaka-ipangato manen ti tailings Storage Facility (TSF) 2 ti nasao a korporasion gaputta dimmalan daytoy iti umno a proseso.
