BAGUIO CITY – Inaprobaranen ti National Electrification Administration (NEA) ti panakaipaluspos ti dumanon P30-M manipud iti pondo ti ahensia ita a tawen para iti implementasyon ti sitio electrification program ti gobyerno kadagiti saan pay a napasilawan a lugar iti Baguio City ken Benguet.
Sigun kenni NEA Administrator Edgardo Masongsong, paset ti mandatoda ti mangipaay iti de kalidad ken mapagnamnamaan a kuryente iti nagduduma a paset ti pagilian tapnu maipasigurado ti panagdur-as.
Kinunana a ti P30-M a pondo ket naipaay iti BENECO kas panangbigbigda iti kina-agresibo ti kooperatiba iti panakatungpal dagiti reporma iti panakaiwaras ti kuryente.
Mangnamnamada pay a babaen iti nasao a pondo ket matungpal ti puntirya ti gobyerno a panakapasilaw dagiti nabatbati a sitio iti pagilian tapnu mapasayaat ti economic activities dagiti benipisaryo nga agresulta iti panagdur-as ti panagbiag kadagiti nasusulinek a lugar.
Naamuan a dumanon iti 80 percent ti napasilawan ti BENECO manipud kadagiti naimbentaryo a sitios iti nagduduma a munisipyo ti Benguet nupay nabaelanda a napasilawan amin a pagtaengan iti 128 a barangay ti Baguio ken 14 a barangay iti Benguet.
